पठाणच्या निमित्ताने

पठाणच्या निमित्ताने

सध्या सिनेसृष्टीत बड्या स्टार्सचा येऊ घातलेला प्रत्येक सिनेमा आपल्यासोबत नविन वाद घेऊनच प्रदर्शनाच्या वाटेवर असल्याचे सातत्याने दिसून येत आहे. आता प्रेक्षकांना पण ह्याची सवय झाली आहे, किंबहुना “बॉयकॉट बॉलीवूड” हा हॅशटॅग त्यामुळेच जास्त ट्रेंडींग असल्याचे सातत्याने दिसून येतो.

१४ जून २०२० ला अभिनेता सुशांतसिंग राजपूतने आपल्या राहत्या घरी आत्महत्या केली त्याला आता दोन -अडीच वर्षे उलटून गेली आहे. एका उमद्या आणि नवोदित अभिनेत्याचा असा आकस्मिक मृत्यू व्हावा ही बातमीच मुळात खूप दु:खद होती त्याच्या अकाली मृत्युला बॉलीवूडमधील गटबाजीच जबाबदार असल्याचे प्रथमदर्शनी दिसून आले होते. त्या घटनेनंतर बॉलीवूडमधील कंपूशाही, घराणेशाही, बड्या ताऱ्यांची स्वैर वागणूक, पाठोपाठ उघडकीस आलेले ड्रग्स प्रकरण या साऱ्यांचा एकत्रित परिणाम म्हणून लोकांच्या मनात निर्माण झालेली खदखद हळूहळू बाहेर येऊ लागली. भारतीय लोक हे मुळात सिनेमाप्रेमी असतात. सिनेसृष्टीच्या बाबतीत एक सुप्त आकर्षण लोकांच्या मनात असते. तारे - तारकांची जीवनशैली आणि त्यांचा भारतीयांच्या जीवनावर होणारा परिणाम हा स्वतंत्र अभ्यासाचा विषय होईल एवढी त्याची व्याप्ती आहे. त्यामुळे ही खदखद आता दिवसेंदिवस उग्र होताना दिसते. लोकांच्या रोषाला दाक्षिणात्य सिनेमांच्या घवघवीत यशामुळे शिडात हवा भरल्यासारखी गती मिळाली. आता त्यात भर पडली आहे शाहरुख खानच्या बहुचर्चित पठाणची!

शाहरुखचा मुलगा आर्यन खानच्या मागे लागलेले ड्रग्स प्रकरण आणि त्यातून उद्भवलेल्या कोर्ट कचेऱ्या यामुळे शाहरुख माध्यमांच्या मुख्य प्रवाहापासून दीर्घकाळ दूर राहिला होता. त्याचे “जब तक है जान, फॅन, हॅरी मेट सेजल, झिरो, दिलवाले …असे गेले काही चित्रपट तिकीट खिडकीवर अपेक्षेप्रमाणे फारसे यशस्वी ठरले नाही. बाहुबली, RRR, कांतारा, असे काही दक्षिणात्य चित्रपट शाहरुखच्या हिंदी सिनेमापेक्षा अधिक कमाई करताना दिसले त्यामुळे बॉलीवूडचा बादशाह म्हणवून घेणाऱ्या शाहरुखसाठी ही तशी धोक्याची घंटा मानली जाऊ शकते.

हा सारा प्रकार नकळत घडून आला की, जाणिवपूर्वक केलेले पब्लिसिटी स्टंट होते असा प्रश्न पडावा इतकी बॉलीवूडची प्रतिमा सद्यस्थितीत जनमाणसात मलीन झाली आहे. गेल्या काही वर्षात हिंदी सिनेसृष्टीने जागतिक पातळीवर स्वत:चे फार मोठ्या प्रमाणावर बस्तान बसविले आहे. जवळपास दोन दशकापुर्वी २००० साली लंडन येथे पहिला वाहिला आयफा पुरस्कार सोहळा रंगला होता. एकविसाव्या शतकाच्या सुरुवातीलाच बॉलीवूडने जग पादाक्रांत करायला सुरुवात केली होती. या साऱ्या प्रकाराची सुरुवात खरतर नव्वदच्या दशकातच झाली होती. अनिवासी भारतीयाना डोळ्यासमोर ठेवून लिहिले गेलेले राहुल - राज सारखे अनेक पात्र शाहरुखने रंगवले होते.

‘चक दे इंडिया” मधून पुन्हा एकदा शाहरुखला तसाच व्हिक्टिम कार्ड खेळणारा रोल मिळाला. रईस मध्ये पण त्याची पुनरावृत्ती झाली. अर्थात फक्त शाहरुख हे सगळं करत होता अशातला भाग नाही. “बजरंगी भाईजान” मधून सलमानने देखील हेच केल. आमीर खानच्या पिके मध्ये अंतरिक्षातून आलेल्या पिकेला पाकिस्तानमधील कोण्या सरफराजला क्लिनचीट देण्याची गरज का भासावी? अक्षयकुमारच्या “नमस्ते लंडनमधील ” एका प्रसंगात देखील अनिवासी भारतीय आणि पाकिस्तानी एकत्र खेळून इंग्रजांच्या टीमला हरवताना दाखवले आहे.

-

-